✍🏻: ജോജി തോട്ടത്തിൽ
കവിതകളോടുള്ള ഇഷ്ടംകൊണ്ടാണ് അയാൾ മകൾക്ക് "കവിത" എന്ന് പേരിട്ടത്. അങ്ങനെ കവിത വളർന്നു പള്ളിക്കൂടത്തിലായി. വൃത്തവും പ്രാസവും ഇല്ലാത്ത കവിത പൂർണ്ണമാകില്ലെന്ന് മലയാളം വ്യാകരണ ക്ലാസ്സിൽ അധ്യാപകൻ പറഞ്ഞത് കേട്ട് കവിത ഞെട്ടി, വൃത്തവും പ്രാസവും ഇല്ലാത്ത ഞാനെങ്ങനെ പൂർണ്ണമാകും?
കവിത പിന്നേം വളർന്നു, പഠിച്ചു, ആ പള്ളിക്കൂടത്തിലെത്തന്നെ മലയാളം അധ്യാപികയായി, കവിതയ്ക്കൊത്തൊരു പയ്യനെ കണ്ടുപിടിച്ചു കല്യാണവും നടന്നു "കവി". നാടും നാട്ടുകാരും അറിയുന്ന കവിതാ സമാഹാരം എഴുതി പ്രശസ്തി നേടുകയായിരുന്നു കവിയുടെ ജീവിതാഭിലാഷം.
കവിയുടെയും കവിതയുടെയും ആദ്യത്തെ മകന് വൃത്തമെന്നും രണ്ടാമത്തവന് പ്രാസമെന്നും പേരിട്ടു, കവിത പൂർണ്ണമായി, കവി കവിയുമായി.
വൃത്തവും പ്രാസവും സാമൂഹീക ജീവികളായി വളർന്നു, നിറയെ സുഹൃത്തുക്കൾ ചുറ്റും ആളും ബഹളവും. വൃത്തം വലുതായപ്പോൾ കവിതയെയും കവിയെയും നല്ലൊന്നാന്തരം വിഷമ വൃത്തത്തിലാക്കി, കള്ളുകുടിച്ചു സർവ്വതും തുലച്ചു, അതെ സമയം പ്രാസം നേരെ വിപരീതമായിരുന്നു അവൻ പേരിനൊത്തു വളർന്നു, നല്ല മൂത്ത കഞ്ചാവ് മാത്രം വലിച്ചു പ്രാസമൊപ്പിച്ചു നാട്ടുകാരെ തെറി വിളിച്ചു നടന്നു.
കവിയുടെ രണ്ടു കവിതാ സമാഹാരങ്ങൾ നാടറിയുന്നവയായി മാറി. കവിത വീണ്ടും പൂർണ്ണമായി!
